中環出更：防範槍劫「正」路叫除罩
尖沙咀日前發生口罩客槍劫錶行案震驚業界。撞正流感肆虐，唔少市民都戴住口罩出入人多地方，商戶想唔接待戴口罩嘅客人都有難度。尋日卓妮喺沙田馬場見到經營名錶生意嘅百利建集團董事總經理陳正欣（Daniel），佢就有妙計氹客人除低「神秘面紗」，但如果對方堅持唔肯除，咁就要加倍留意係咪有可疑喇！
請客飲嘢博見真貌
Daniel話，開門做生意，提供貼心嘅服務好重要，所以店員如果覺得戴住口罩嘅客人有古怪，可以關心吓對方係咪唔舒服，例如請佢飲杯暖水、熱茶甚至蜜糖水，總之諗盡辦法氹客人除低口罩。咁聘用持槍警衞加強保安有冇得諗呢？Daniel認為行唔通，事關咁做會令客人感覺緊張，萬一真係遇到持槍匪徒，警衞同匪徒駁火，亦只會導致更多人命傷亡咁話。
做鐘錶生意嘅香港工業總會主席劉展灝就話，今次事件確係令人震撼，因為過往珠寶鐘錶行業最多係遇到騙徒，用假信用卡、用假貨偷龍轉鳳或者偷嘢等，根本估唔到竟然會攞支槍出嚟咁大鑊。不過，佢認為鐘錶業界唔使特別緊張，事關就算便利店一樣有機會遇到持械行劫，最緊要係店員識得隨機應變。
「食力簡」嘆錢累人
好耐冇出席公開場合嘅香港前冠軍練馬師「食力簡」簡炳墀亦有入馬場，佢戴住黑超，甫入馬場即被馬迷圍住攞簽名、影合照。因賄選而入獄幾個月嘅食力簡感慨話，錢真係會累人，佢依家過住退休生活，得閒約朋友食吓飯，已經好開心。
卓妮