近排反水貨客示威搞到七國咁亂，香港由好客之都淪為趕客之都。其實，除咗反水客鬧劇趕客，無牌旅館遍地開花，危機四伏，一樣令旅客怕怕o架。呢，千呼萬喚之下，當局終於建議修例打擊無牌旅館，不過成效係點，仲要睇過至知。
民政事務局尋日公布《旅館業條例》諮詢結果同修例建議，如果大廈公契禁止經營旅館或其他商業活動，當局可以拒絕發牌或續牌；喺簽發新牌或續牌時，亦會顧及大廈居民同申請人意見，另外又規定持牌旅館必須購買第三者保險。至於無牌旅館嘅罰則，建議從依家罰款二十萬元同入獄兩年，增加到五十萬元同入獄三年，再犯可能被封舖半年添。
即係咁，過去當局對旅館發牌求求其其，只要符合建築物條例同消防條例就來者不拒，以致旅館質素良莠不齊，問題多多，特別係唔少旅館位於舊樓，衞生情況惡劣，安全隱患多多，市民早就怨聲載道。年前北角五洲大廈發生奪命火警，再次暴露當局對旅館監管不力，市民要求檢討及改善嘅呼聲一浪高於一浪，當局拖到依家至話修例，簡直係後知後覺。
當然喇，遲到好過冇到，當局肯亡羊補牢，點都好過翹埋雙手乜都唔做。不過咁喎，你有張良計，佢有過牆梯，有業界人士講到明，新例實施後，唔夠條件攞牌嘅旅館，有啲會結業，更多會轉向地下經營，如果當局巡查監管不力，分分鐘弄巧反拙，添煩添亂嘅咋。
咁講唔係無理由o架。民政部門一三年巡查無牌旅館近萬次，但檢控數字得一百七十多宗咁大把，完全唔成比例。更離譜嘅係，即使成功定罪，往往只係罰幾千蚊了事，仲平過交租，唔止冇阻嚇力，直頭變相鼓勵犯法添。家陣無牌旅館成行成市，梗有一間喺左近，有啲旺區一條街就有七八間，除咗因為有利可圖，閒閒地每個月賺幾十萬，更加因為當局有法不依，執法不嚴。
對於檢控數字長期偏低，當局解釋係因為搜證困難，加上好難進入懷疑無牌經營嘅旅館喎。其實呢啲只係藉口啫，申訴專員公署曾經派員放蛇扮旅客，一次行動就發現多間無牌旅館，仲踢爆唔少持牌旅館兼營無牌「影子旅館」添。所以話，要規管無牌旅館，唔係冇辦法，而係官僚冇心肝啫。
點講都好喇，世不患無法，而患無必行之法。當局唔加強監管，無論點樣修例都係嘥氣咋。嗱，之前就話酒店供不應求，無牌旅館問題難解決啫，家陣有人反水客搞到旅客數字下降，酒店隨時要拍烏蠅，係時候認真規範旅館業喇。