警隊一哥曾偉雄將於今年五月退休，唔少人都好關心佢嘅去向，究竟會否好似前任一哥鄧竟成咁做政協？定係好似再前任一哥李明逵咁教吓書同教人煮嘢食？又或者加入私人機構？答案全部都係：No（唔係）！
曾Sir尋日同傳媒午宴嗰陣，就不停被追問上述問題，佢好幽默話，政府高官退休後到私人機構工作受到好多限制，連賣菜都同警察有接觸，所以佢決定唔會加入私人機構。至於教書呢？佢話唔想被人話佢洗腦喎！咁教人煮嘢食呢？曾Sir好謙話，自己淨係識煮即食麵，所以都係唔考慮喇。講到從政，佢喺好多場合都話政治太難，自己唔識。
最後答案係做義工，曾Sir話會去一啲慈善機構幫手，打一啲年薪一蚊雞嘅工。其實曾Sir在任一哥四年，經歷唔少風風雨雨，包括處理佔領行動，依家退下火線，係時候休息吓喇。