政府早前成立長遠財政計劃工作小組，話要透過成立「未來基金」，避免香港出現結構性赤字。不過，呢個舉動引來唔少爭議，尤其被人批評係將納稅人啲錢收埋，令「糖」派少咗。可能因為咁，財經事務及庫務局常任秘書長謝曼怡尋日就殺入泛民主派嘅周五飯盒會講解，唔知道佢有冇趁機會游說溫和泛民議員高抬貴手，唔好喺審議財政預算案嘅時候「拉布」呢？
泛民逢周五中午都會開飯盒會，討論每周熱門議題，但尋日飯盒會花得最多時間就係畀謝曼怡簡介未來基金，雙方討論近一小時。其實飯盒會以往好少有官員列席，相反有幾次只係泛民主動搵官員出席。
據講飯盒會上一次同官員見面係去年七至八月，因應政府總部決定喺俗稱「公民廣場」嘅東翼前地對開興建大閘加強保安，佢哋就搵咗行政署署長蔡潔如到飯盒會解畫。
聞說今次會晤係由謝曼怡主動提出，主要想向泛民議員講解未來基金。議員喺會上對此好多意見，認為啲錢應用喺全民退休保障等長遠政策；亦有議員質疑設立呢個基金毋須經立法會批准，究竟議會有咩角色監察喎。
不過，謝曼怡會上只係講解基金構思及聽意見為主，冇乜具體回應。