政情：泛民取經密謀再佔?
政改方案將於今年六、七月喺立法會表決，加上去年佔領行動陰霾揮之不去，部分示威者至今仍然死守立法會外一帶，難怪立法會主席曾鈺成預言今年夏季會再爆發大規模抗爭行動。空穴來風，未必無因，繼外號「李漢奸」嘅民主黨創黨主席李柱銘遠赴加拿大乞求干預香港政改問題後，同台獨勢力關係密切嘅華人民主書院更裏應外合，組隊赴台會合太陽花學運領袖，唔通就係為下一波佔領行動做部署？
AV仁辯稱恒常交流
華人民主書院校長、社民連前主席陶君行今日啟程赴台，出席周日起一連兩日舉行嘅台港社運交流研討會，同行嘅仲有身兼支聯會主席嘅民主黨立法會議員何俊仁（AV仁）及真普聯召集人鄭宇碩，就咁睇牌頭已經相當有嫌疑。
據了解，兩日研討會除咗回顧同檢討太陽花學運同佔領行動外，多個同佔領行動關係密切嘅泛民主派成員，包括喺佔領行動清場期間、涉嫌被警員毆打嘅公民黨成員曾健超、社民連立法會議員梁國雄（長毛）、民陣警權關注組召集人陳樹暉及民陣副召集人楊政賢等都會參與。
台灣方面又有邊啲「領袖」接待佢哋呢？我哋向幾個參與者了解過，大部分都支吾以對，唯獨AV仁就承認，一定會同太陽花學運嘅核心人物有交流，「（民進黨前主席）施明德都有份」，攞正牌同台獨勢力切磋交流。陶君行就話，同類型研討會已經搞過兩次，今次只係恒常交流，冇乜特別啫。
赴台後爆抗爭有前科
雖然佢哋講到赴台好似無咩特別，但如果大家記得嘅話，支聯會前主席、工黨立法會議員李卓人，早於前年就同「佔領中環」發起人朱耀明等人訪台，趁佔領行動爆發前向施明德會面「求教」。適逢當時泰國爆發大規模示威，李卓人更公開話要向當地反政府運動「取經」，希望可以「搞大」佔中，結果一語成讖。
AV仁等人喺呢個政改表決前敏感時刻赴台，與台獨勢力會面交流，實在令人聯想佢哋為下一波佔領行動做部署，到底當中有冇「求教」成分，好快自有分曉。