中環出更：胡慧中愛心書撰人熱淚
港澳台灣慈善基金會（基金）日前舉行春茗，基金主席何玉美（Emma）、創會主席林添茂及永遠榮譽主席錢立祐等台灣幫齊歡聚，互賀新春之喜。講起今年基金工作嘅重頭戲，Emma話係將「愛心獎」由香港及台灣擴大到內地，任務十分繁重。加入基金做總理嘅民政事務局前局長何志平太太胡慧中（Sabrina）都有到場，佢最近出咗本記錄愛心獎得主故事嘅新書《在人間遇見天使》，感觸良多。
首次躋身作家之列嘅Sabrina話，去年夏天佢同Emma等人穿梭台港，訪談十二位善心人士，形容本書係用汗水及淚水寫成。
被踢爆喊完即捐錢
今次任務令佢明白一個道理，就係行善唔使自身大富大貴，只需有一顆愛心。Emma就笑稱，兩人每次聽人哋講述故事就哭成淚人，要匿入廁所補妝先得。Emma爆料話，Sabrina經常喊完就好有愛心咁掏腰包捐錢畀人，或應承捐物品。
當晚到場嘅仲有林添茂太太兼泰山企業執董林陳鳳招、基金總理張炳煌及劉李麗珉等人，基金副主席陳趙滿菊（Joise）亦趕場出席。Joise神情好輕鬆，事關佢身兼嘅國際華商協進會主席之位，將交棒畀基金副主席羅台秦（Louisa），儀式將於九月舉行。Louisa話，佢正招攬與台灣關係緊密嘅兩岸四地工商界人士加入，希望做好促進貿易及投資合作嘅平台。
卓妮