政情：葉劉自爆當年跟孫公搵食
近年政府要發展新市鎮時，都遇到唔少阻力，但呢啲問題三十年前已經出現。話說立法會議員葉劉淑儀喺沙田車公廟被麒麟撞飛後，令佢「翻箱倒籠」諗番自己同沙田有咩淵源。葉劉尋日喺社交網自爆，話八十年代出任新界民政署官員時，政府想發展沙田做新市鎮，咁啱當時沙田理民官就係孫明揚（孫公），葉劉就曾經跟孫公「搵食」。
開發沙田 村民「糞」示官員
葉劉話，當年做新界民政署，每月都要落區同理民官開會，通常會後都夾錢食餐好，所以新界各區有咩別具風味嘅食肆，佢都一清二楚。有次葉劉就打電話問孫公幾時帶佢去大圍食最出名嘅山水豆腐花，點知孫公就話：「要食就快啲嚟，因為大圍差唔多拆晒！」原來當年沙田因為發展新市鎮，好多餐廳都被迫遷。至於葉劉最終食唔食到碗山水豆腐花，咁就不得而知嘞。
講到政府收地迫遷，葉劉又爆多件「有味」嘅事，話當年政府喺沙田收地時，村民經常因為風水、祠堂和金塔等遷拆問題而不滿，不時出動糞便「招呼」官員，情況同啲電影情節非常相似喎，所以負責開發新市鎮嘅官員真係勞苦功高。