民主黨立法會議員何俊仁（AV仁）同社民連梁國雄（長毛）喺一二年提出司法覆核，以特首梁振英（CY）僭建大宅為由，挑戰特首選舉結果，但先後被高等法院及終審法院判敗訴，更被下令支付CY同律政司嘅訟費合共二百七十三萬元。不過，據知二人至今前後只係還咗二百五十萬元，仲爭二十三萬元未找數，特首辦公室日前就向二人發律師信，追番二十三萬元堂費。
CY喺一二年當選後，被揭發其大宅共有六處僭建物，參選特首但落選嘅AV仁聯同特首選委長毛，指控CY喺選舉前作出失實宣稱，並利用僭建醜聞攻擊對手唐英年，先後提出司法覆核。AV仁更同時提出選舉呈請要求推翻結果，但被高院拒絕受理，終院其後亦判其敗訴，二人可謂「完敗」。
其實AV仁不但被特首辦追數，連喺選舉呈請案中擔任AV仁法律代表嘅林偉展黎志超律師事務所，前日亦入稟高院向AV仁追番律師費，AV仁真係周身債。