政情：「鍾」意抓撈「傑」出歪理

叫政府出錢幫泛民「轉軚」

鍾庭耀尋日出席電台節目時話，政改方案嘅焦點係能否喺立法會通過，問題並唔在於方案本身，而係點樣處理紛爭，又認為要解決目前膠着局面，唯一出路就係靠民意。鍾庭耀建議進行全民投票，如有五十萬、一百萬人投票，議員就要參考投票結果，同時如果有三分之二投票市民接受政府政改方案「袋住先」，泛民就應考慮唔否決政改方案。不過，講到尾都要有議員願意根據全民投票結果喺議會投票，咁先有意義。

鍾庭耀仲叫政府畀啲空間，唔好一下子打沉，甚至建議當局喺推出政改方案之後進行全民公投。如果真係由政府進行公投或民意調查，相信最大得益都係港大民研，事關隨時可接到呢單大生意，所以鍾庭耀提出呢個建議，會否令人覺得佢有兜生意之嫌呢？至於另一得益者就係泛民，如果結果顯示民意係反對方案，政府就等於倒自己米；但如果民意係支持方案「袋住先」，亦等同政府出埋錢幫泛民搭建華麗轉身嘅下台階，亦開咗壞先例。

「袋巾」潑冷水 怕民意逆轉？

不過，鍾庭耀嘅建議未被政府打沉，袋巾傑已潑定冷水，佢話去年「六二二」全民投票時已有七十萬人表態要求議員否決不符國際標準嘅政改方案，認為已有足夠民意授權，冇必要再做全民投票。眾所周知，「六二二」投票時並未有人大「八三一」決定，當時嘅投票結果又點可以代表目前民意？再者，泛民經常話自己係民意授權嘅代議士，何解唔再聽取多一次民意？莫非泛民真係為反對而反對，抑或怕民意逆轉要支持政改？

民主黨議員劉慧卿認為，如要搞全民投票就要拉政府落水，政府要先承諾如果民意反對政改方案就會撤回。不過，律政司司長袁國強就回應，根據《基本法》，本港係冇公投概念，仲反問如果泛民不論投票結果係點都會否決政改方案，咁全民投票仲有咩意義呢？