中環出更：「歡」顏對厄運 自傳勉青少
每人都有一段過去，呢段歷史雖然唔能夠改變，但點樣面對，就可以自行掌握。由反佔中搞默站行動開始而廣為人熟悉嘅律師江玉歡（Doreen），就選擇以勇敢面對自己嘅過去。話說Doreen讀中學時經歷三次痛苦，先係父母突然離婚，媽媽又因肝病離世，最後佢先從親戚口中得知，自己同家姐原來都係孤兒。當佢想報答父母養育之恩時，媽媽已經不在人間。
Doreen早年就出咗本自傳，希望透過分享自身經歷，期望年輕人可以愛錫父母，唔好等失去咗先珍惜。佢話，當年知到自己係孤兒後，逼住要學識照顧自己，平日忙於學業，放假就做兼職，幾經辛苦完成中學課程，最終更成功考入港大讀法律系。
女律師擬參選區會
直到佢出來工作，養父突然搵番佢團聚。但好景不常，當佢想花多啲時間陪爸爸時，爸爸因為經歷三次癌病煎熬而離開人間，令佢明白「子欲養而親不在」呢種痛苦。雖然有慘痛經歷，但Doreen選擇樂觀面對，去年更加入新民黨嘗試從政，仲積極考慮參選年底區議會，相信呢種堅毅不屈性格，應該有助佢從政之途。
卓妮