中環出更：媲美日貨 丁午壽撐內地廁板

塑膠呢個行業除咗需要新思維，仲好需要多啲新血，當晚卓妮就見到部分較少見嘅新面孔，好似從事電器業嘅成員高家豪，仲有口齒伶俐嘅女司儀鄭凱茵（Serena）。Serena係香港工業總會副主席鄭文聰女兒，雖然好少女性會對工業感興趣，但佢自細跟父親接觸環保科技，覺得呢個行業特別親切，所以讀碩士時亦特別修讀相關科目。

鄭文聰批拉布窒礙環保科技

鄭文聰就話，立法會議員經常「拉布」導致好多政策通過需時甚至失敗，令環保科技行業在港停滯不前；反觀內地對環保方面支援就好多，香港真係要加把勁先追得上喇。點解塑膠業會扯咗去環保科技呢？其實兩者息息相關，商會主席孫榮聰話，以前推出一件新產品，要先生產出來觀察市場反應，而製作模具成本又高，但依家就可以用３Ｄ打印出來畀客戶睇吓係咪啱心水先開始生產，環保好多。

經營玩具生意嘅副主席丁煒章就發現時下小朋友多數鍾意玩電子產品多過玩具，但咁樣對佢哋專注力及視覺方面均有影響，所以其公司正不斷摸索新嘅發展方向，例如生產多啲同運動有關嘅器材等，以平衡小朋友體能上嘅鍛煉。

孫榮聰（後右）與弟弟孫榮良（後左）、父親孫啟烈（前左）及爺爺孫建超（前右）三代均為家族生意打拼。（陳嘉順攝）

鄭凱茵（中）擔任新春晚宴司儀，獲父親鄭文聰（左）及媽咪（右）現身支持。

卓妮