政情：白鴿黨慶甩底 張炳良補飛
民主黨（白鴿黨）因聲言要否決政改方案，仲話要喺否決政改方案後搞辭職變相公投，搞到連該黨上月舉行嘅二十周年晚宴都被政府杯葛，原本答應出席晚宴嘅運輸及房屋局局長張炳良同食物及衞生局局長高永文都忽然「放飛機」。不過，該黨主席劉慧卿尋日就透露，張炳良有發短訊畀佢，就缺席晚宴一事道歉「耍冧」，仲約白鴿黨本月底食飯添！
曾任白鴿黨副主席嘅張炳良，原本話會出席白鴿黨黨慶晚宴，點知喺晚宴前夕忽然話遇着公務，要前赴珠海與港珠澳大橋管理局局長朱永靈會面，以及到工地視察，了解大橋工程進展，最後甩底收場。卿姐尋日同傳媒茶敍時話，張炳良有就未能出席道歉，又約佢同黨內另外五位立法會議員，以及兩位副主席喺今個月三十日食飯補數。至於被問到因為休假冇出席晚宴嘅高永文事後有冇表示，卿姐就話對方冇聯絡過佢喎。