政情：怕醜法律「男神」 做過記者
法律界早前有五十幾名律師、大律師及法律系學生成立「法政匯思」，其中一名召集人梁允信（Wilson）係大律師，以往比較少喺公眾場合表達政見，估唔到當日喺成立記者會上被封為「男神」。Wilson怕怕羞羞話，因為當日有啲記者想諗啲較出位嘅標題，強調只係業界或政界中人先可能識佢，起碼依家行出街唔會有人話佢係「男神」喎。
對採訪來者不拒
Wilson透露，自己唔係一開始就立志做大律師，而係先讀哲學，之後再讀國際關係，最後先疊埋心水專攻法律。佢又話，原來十幾年前做實習，曾經去過兩間本地英文報章做記者，負責採訪專題新聞，好似做過點樣平衡工作同生活嘅故事。Wilson笑言，當時食過受訪者「閉門羹」，所以依家對記者都會來者不拒。
咁將來會唔會從政？Wilson就話唔會講「Ｎ屆唔選」，但講明法律係佢鐘意嘅嘢，放棄嘅話會係好大犧牲。另外，Wilson透露自己師承大律師公會副主席林定國及資深大律師夏偉志。夏偉志有名「專一韋小寶」，唔知佢有冇喺師傅身上學到一招半式呢？