政情:張學明返「鄉」保區會議席

新界鄉議局廿七個鄉事委員會(鄉委會)本月換屆,因應下屆區議會取消委任制,拒絕經營地區直選嘅新界鄉紳,都選擇轉戰鄉委會主席選舉,希望以主席身份自動成為區議會當然議員。除咗本身係屯門委任區議員嘅鄉議局主席劉皇發(發叔)將以屯門鄉委會主席身份重返區議會外,據聞同樣係委任區議員嘅鄉議局副主席張學明為保議席,日內選舉亦勢要重奪大埔鄉委會主席之位,確保延續大埔區議會主席地位。

文重返康樂園選區有難度

適逢今年鄉委會同區議會都換屆,張學明為保大埔區議會主席之位,如果唔落區直選,就必須循大埔鄉委會主席途徑重返區議會做當然議員,現任大埔鄉委會主席文春輝自然成為佢嘅障礙。原本鄉事派內部最理想係透過協調,令鄉委會喺無競爭嘅和諧氣氛下順利過渡新一屆,但據聞文春輝仍然想連任鄉委會主席,即使早已收到風聲張學明有意重奪鄉委會主席之位,仍要焗住落場一戰。

有口痕友透露,文春輝早已聞到(火羅)味,並部署重返康樂園選區,希望至少保得住大埔區議會副主席之位。不過,民建聯亦有意派人出選該選區,令文春輝連任區議員嘅最後機會都可能幻滅。文春輝經此一役,不但大埔鄉委會主席危危乎,連帶區議會副主席、區議員甚至鄉議局執委都隨時一鋪清袋。

何君堯獲「祝福」續坐鄉局

當年文春輝為康樂園區議員,因為當選大埔鄉委會主席成為大埔區議會當然議員,因而令康樂園選區議席懸空,如果今次又係因為鄉委會主席一職而失去區議會議席,咁世事真係好玄妙。

至於另一戰區就係屯門鄉委會,我哋報道過屯門鄉委會主席何君堯「順攤」讓路予發叔,全因何君堯已鋪定後路,除咗獲「祝福」落區對撼屯門區議員何俊仁(AV仁),更有望再獲「祝福」以增選議員身份繼續坐番鄉議局。結果會係點,相信好快自有分曉。

第一手消息請下載on.cc東網iPhone/iPad/Android/Windows Phone Apps