台灣有個士林夜市，有聲有色，遠近馳名，成為遊人如鯽嘅旅遊勝地；香港本來都唔差，一樣有個桂林夜市，一樣有聲有色，一樣聞名遐邇，可惜淪為是非之地，面臨被趕絕厄運，真係同遮唔同柄，同市唔同命咯。
所謂桂林夜市，其實係逢年過節，深水埗桂林街都有大批地攤同熟食檔擺賣，極具地道特色同人情味，因而深受市民歡迎。不過咁，無牌擺賣始終唔合法，加上帶來環境衞生等各種問題，夜市被食環署大舉掃蕩，本來「咖喱魚蛋拂面來，漫天牛雜連雲開」嘅賓虛場面，今日已經盛況不再。所以咯喎，深水埗區議會尋日討論有關問題時，多名議員大嘆可惜，要求當局發放臨時或特約小販牌，令桂林夜市可以繼續生存，而官老爺就話持開放態度喎。
冇錯嘞，本港嘅夜市攤檔由來已久，唔係乜嘢洪水猛獸，只要當局規劃得宜，監管到位，處理好衞生、安全同交通等問題，何必趕盡殺絕呢？再講吖，市集係人類歷史最悠久嘅商業活動，只要有需求，就會有攤檔，一味掃蕩根本唔係治本之道，只係將小販趕去其他地區，將問題推畀其他地區。嗱，今年農曆年期間旺角山東街一帶湧現大批流動熟食檔，冇咗桂林夜市，多咗「山東夜市」，問題咪一樣存在！
係人都知，小販檔係香港本土特色，牛雜魚蛋等街邊小食更加充滿港式風味，難得桂林夜市搞得有聲有色，打響名堂，如果加上適當規劃同推廣，話唔定真係可以變成另一個士林夜市o架。到時基層可以自力更生，市民可以樂在其中，香港可以多一個特色旅遊景點，一舉三得，何樂而不為？話時話，港府話研究引入外國美食車，打造旅遊景點，以港產官僚議而不決、決而不行嘅作風，計劃隨時又係虎頭蛇尾嘅咋，不如因利乘便搞好夜市仲實際喇。
講起都好笑，港府話要發展本土特色經濟，大大話話講咗十幾年，結果一事無成，咪就係因為港產官僚無眼光無承擔囉。當年金融風暴之後，港府煞有介事提出「振興本土經濟」，仲喺黃大仙搞過「騰龍墟」添，點知一陣風過後就無聲無息，關人個關。至於近年嘅天水圍天秀墟，更加係慘淡收場，本土特色經濟就冇嘞，本土特色丟架就有！
由於趕絕桂林夜市引起各界反彈，食衞局局長高永文話喎，會喺小販發展及規管之間取得平衡，研究成立露天小販市場同夜市。嗱，港產官僚唔好再大隻講吖，搞政改就話唔容易，搞夜市唔係咁難嘅啫，係咪！