政情：今日你上鏡：施榮忻叫旅客拖篋行盧吉道
行山除咗有機會野生捕獲影星周潤發，我哋日前行經山頂盧吉道亦捕獲百仁基金前主席施榮忻（Jaime）。家住赤柱嘅Jaime透露好鍾意到盧吉道跑步，平日亦會經灣仔峽道上山，但難度大好多。
既然對盧吉道情有獨鍾，唔知佢有冇簽名反對發展商擬將盧吉道大宅改建酒店呢？Jaime坦言冇簽名，認為財團要發展好難阻止，但認同盧吉道實在太窄，根本冇位畀接載住客嘅電動車同行人同時經過；佢反建議旅客既然入住盧吉道，應該順應酒店特色，自己拖篋沿盧吉道行入酒店喎！有傳Jaime係青年事務委員會主席嘅接棒人選，佢再否認傳聞，話未有人搵過佢，自言未夠班做主席添！