政情：查許案涉廖暉 「神探」感意外
「貪曾」前特首曾蔭權爵士涉貪案最終能否落鑊惹起全城關注，負責調查嘅廉政公署執行處助理處長（特別職務）余振昌可謂孭重飛，佢亦係負責調查前政務司司長許仕仁案嘅幕後大腦，堪稱廉署「雙貪案神探」。佢尋日同傳媒茶敍時，就講吓查許仕仁呢單世紀貪污案嘅感受，話好多嘢都係始料不及，包括許仕仁在庭上作供時，突然爆出前港澳辦主任廖暉呢個名，真係令佢極為意外。
七年查逾二千戶口
更令人意外嘅係，余振昌作為堂堂助理處長，話調查許仕仁案初期，為咗防止走漏風聲，愈少人知愈好，佢同另外三位廉署調查人員連影印都做埋。佢調查時發現許仕仁放棄入住政務司司長官邸，堅持入住禮頓山已覺得好奇怪，結果花咗七年時間，最終將案中各被告繩之於法。據知廉署為咗查「許仕仁案」，最少調查咗二千幾個銀行戶口。
其實余振昌仲查過好多大案，包括「冼錦華案」，仲有八十五億元私煙案，當年嘅證人徐道仁喺新加坡被殺，佢當時負責去當地認屍，提到案中有證人被殺，仲要屍沉大海，佢都話感慨無限。