政情：公民講場：白鴿黨內訌 「明」阻「仁」辭職

民主黨（白鴿黨）立法會議員何俊仁（AV仁）早前宣布計劃喺否決政改方案之後辭職發動變相公投，以推翻人大「八三一」決定，要求重啟政改。而黨內對AV仁嘅大計都摸不着頭腦，意見紛紜。該黨下月就會召開會員大會，畀會員投票表態。一直擔起白鴿黨籌款委員會主席重任嘅立法會前議員李華明（肥仔明）就講明唔支持AV仁搞辭職公投，嚟緊會游說其他黨友反對，仲話如果最終通過支持AV仁嘅話，佢都唔識點樣再幫個黨籌款，不如唔做籌委會主席咁話。梗係啦，辭職發動變相公投動輒要個黨花費幾百萬元選舉經費，睇嚟AV仁要搞辭職公投，都要過咗肥仔明嗰關先。