中環出更：暴民反水客 快必劃清界線
整個泛民主派板塊近年已大分裂，而泛民內嘅激進勢力更加分成幾個陣營。好似早幾日「反水貨客」行動嘅示威者，一日內突襲屯門、尖沙咀同上水三處，暴力、野蠻行徑令人髮指，被狠批為暴民，事後警方總共拘捕七人。不過，估唔到單係今次反水貨客行動，都引發人民力量（人力）同有份組織行動嘅激進派政團劃清界線。
人民力量（人力）成員譚得志（快必）尋日就喺社交網站以「人民力量執手尾」為題，大呻今次反水貨客遊行，熱血公民及本土民主前線都有份組織，但事後無晒影，令被捕示威者求助無門，最奇怪係有示威者家屬向無參與行動嘅人力求助，人力於是聯絡義務律師協助一位被捕嘅十五歲少年搞保釋支援。
呻人力執手尾
快必坦言，最擔心有街坊以為人力有份參與今次「打水貨客義和團式」行動，所以人力要同呢種行為劃清界線。快必又話，今次事件要人力執手尾，真係多謝晒熱血公民及本土民主前線兩個組織囉！人力同熱血公民互片唔係第一日嘅事，睇怕激進派呢啲恩恩怨怨，一時三刻都唔能夠化解，怕且要去到年底區議會選舉時，先可以埋單計數。
卓妮