【本報訊】反水貨客示威者前日轉戰屯門時，一度包圍拖着行李篋的兩母女惡言辱罵，女童受驚放聲大哭，緊抱媽媽不放，即使不斷安慰「呵番」都「收唔到聲」。相關事件詳細片段昨日曝光，可見被罵母親已不斷澄清自己並非水貨客，甚至主動打開行李篋以證「清白」。

片段顯示，拖着女兒的母親與示威者對質時情緒激動，不斷質問：「我點走私？我點走私？」又指着示威者高叫：「報警呀！報警呀！」。在示威者起哄下，該名母親更打開行李篋，顯示篋內大多為兒童書籍，反問對方「我點走水貨？」

母親其後爆出一句：「你哋係大陸人？你哋正人渣！」進一步激起示威者情緒，除了澄清「我哋梗係唔係大陸人」，更以粗口辱罵她，叫她「快啲走啦！」其女兒受驚大哭不停，母親則指着示威者說：「嚇親我小朋友」，大鬧「所謂香港人蝦我哋兩母女！」此時，有示威者反指兩母女「唔好扮可憐」，母親再反問對方：「走咩私呀？」、「自己係中國人都唔承認！」這句話再次觸動示威者神經，激動地稱「我哋唔係中國人呀！」

有蒙面示威者開始「知衰」，改口稱「唔係你走私，係你啲同胞走私，令到我哋生活困難。」另有示威者指「你唔係買嘢返大陸，咁你響度做咩？」母親回答：「我小朋友響度讀書呀！」旋即再惹來示威者炮轟，指「你響度讀書，你搶埋香港人嘅學位，香港人連住嘅地方都冇！」

該名母親即場報警求助，指自己與女兒在回家途中無端被包圍、恐嚇及辱罵，但一直講不清確切位置。示威者則自稱無包圍她們，「仲有好大條路畀你行」，同時繼續指摘她們搶奪香港人資源，「你有冇納稅？你有納稅我向你道歉！」期間女童不斷放聲大哭，狀甚可憐，並哀求媽媽離開，帶她回家。及後有一女子路經，好心上前為女童拭抹眼淚，並呼籲示威者「唔好搞細路女」，片段亦告結束。