有人話，任何小問題只要乘以十三億，都會變成大問題，真係冇講錯o架。好似奶粉咁，畀中國人搶到斷市咁滯，連國家領導人都承認，家陣全世界都鬧奶粉荒。
講到奶粉荒，香港人最有切身體會。喺內地客瘋狂掃貨之下，奶粉一罐難求，搞到要實施限奶令；激進組織仲乘機發動反水貨客示威，一時「驅蝗」，一時「光復」，七國咁亂。當然喇，搶奶大軍唔止攻陷香港，更加揚威國際添。早排德國有超市將貨架嘅奶粉上鎖，又掛出用簡體中文寫嘅「沒奶粉賣」告示，都咪話唔誇張。
咁就奇嘞，中國都有奶粉賣o架，點解要山長水遠去外國掃貨呢？有京官係咁解釋嘅，由於內地嘅消費稅比較高，加上外國品牌喺中國賣得貴啲，導致唔少人去境外消費，當局會採取措施引導國人留喺國內消費喎。
其實，中國人對外國貨趨之若鶩，價錢只係其中一個考慮，最重要係外國貨質量比較有保證。今時今日中國製造已經淪為「假冒偽劣」嘅代名詞，特別係食品，幾乎樣樣都有毒，樣樣都造假。轉基因大米、水銀刀魚、蘇丹紅蛋、孔雀石綠魚、石蠟豬肉，沒有做不到，只有想不到。唔怪得有人諷刺中國人發明毒化食品嘅聰明才智，一早應該攞諾貝爾化學獎啦。淨係講牛奶吖，人哋就「一杯牛奶強壯一個民族」，中國就「一杯牛奶飲壞一個民族」，唔係飲出大頭娃娃，就係飲到結石寶寶，就算價錢幾平都冇人敢再冒險喇。
好簡單，睇吓中國人境外購物清單愈來愈長，就知道係乜嘢一回事，除咗搶購奶粉，其餘商品都唔放過。最好笑嘅係，近排流行去日本掃貨，五公斤大米索價一千五百元人民幣，一樣有中國人幫襯，甚至連電飯煲及廁所板都被中國人一掃而光。如果空氣有得賣，相信都會有唔少捧場客o架。舊年中國出境遊人數突破一億大關，消費超過一萬億元人民幣，肥水統統流入別人田，講起都可悲。一個可以製造太空船嘅國家，竟然生產唔出安全奶粉同食品，問你服未。正如前排有位女法官話齋，自己國家生產嘅嘢，自己都唔敢用，簡直係國恥。
點講都好喇，有頭髮冇人想做瘌痢，如果國貨靠得住，邊個會舟車勞頓去掃貨，仲要畀人鬧「蝗蟲」吖。所以話乜都係假，減稅又好，引入外國品牌都好，只要假冒偽劣問題一日唔解決，境外掃貨大軍只會不斷壯大。國產官僚與其叫人留喺國內消費，不如做好監管先喇！