政情：公民講場：民主阿婆方案次貨迅遭識破

人稱「民主阿婆」嘅政務司前司長陳方安生為咗保送泛民主派「出閘」參選特首選舉，不惜度身訂造所謂「候補人方案」，建議未獲過半數支持「出閘」嘅參選人，都可以行後門循「候補人」身份參加特首選舉。爛招一出，隨即遭圍插。政制及內地事務局局長譚志源（Raymond）都以「貍貓換太子」形容騎呢方案，直言唔值得考慮，仲話方案違反人大「八三一」框架中，有關只容許兩至三人參選，及候選人須獲過半數支持方可出閘嘅限制。民主阿婆盤算將候補人方案呢隻「貍貓」魚目混珠，卻迅速被Raymond識破，睇怕呢隻「貍貓」都係凶多吉少。