政情：市民點上車？ 「樓王」張冇答
青年事務委員會舉辦嘅青年高峰會議尋日舉行，唔少年輕人趁機追問置業問題，就算唔係屬於該政策範疇嘅官員，都照問可也。勞工及福利局局長張建宗（小肥張）亦被問點解決「上車」難問題，小肥張就搞笑稱：「我姓張，不過唔係（運輸及房屋局局長）張炳良」喎！
自詡「展翅之父」
話就話自己唔係負責嘅政策局，不過小肥張都幫口話，特首每日舉行早禱會時都會跟進房屋規劃議題。其實小肥張喺官場一向有「樓王」之稱，按去年最新公布嘅資料，佢同家人共持有九個物業，成為問責官員之首，連張炳良都唔夠佢多，畀佢分享吓點樣「上車」都夠資格有餘喇！
另外，有人問佢點睇投身技術性行業。小肥張認為透過學徒培訓，行行都可出狀元。講講吓，佢吹水話當年擔任勞工處處長時，一手推動展翅計劃，自詡為「展翅之父」喎！