政情：公文袋揀「大內總管」多波折
公民黨前總策劃幹事黃晙（Ian），喺佔中期間捲入非禮男性青年醜聞，被迫無限期休假。該黨其後搵咗Ian嘅上手、當時啱啱喺英國讀完書返港嘅歐陽志飛（歐飛），暫代呢個「大內總管」職務，但歐飛講到明只會做到今年四月，即下個月就走人。咁啱Ian早前獲判無罪，有人仲見到佢再次現身黨內活動，令外界傳出公民黨會「翻閹」Ian做總幹事。
黃晙判無罪 曾傳「翻閹」
有關消息傳出後，立即惹來黨內外人士議論紛紛，認為Ian雖已被判非禮罪名不成立，但庭上公開嘅案情細節頗為露骨，如果由佢做番總幹事，難免會進一步影響公民黨嘅形象同年底區議會選舉嘅選情，畀對手私底下向啲師奶同教徒選民大做文章。
最新消息係，公民黨啱啱喺前晚通過，委任佢哋其中一位執委余冠威接任總幹事一職，貪佢做過該黨黨魁梁家傑嘅議員助理，合作一定冇問題，亦冇聽過佢有乜桃色問題。
另外，至於Ian同歐飛唔做總幹事之後，據聞就會繼續以義工身份留喺個黨度幫手。