政情：阿蘇麻煩友？下屬急腳走
近日官場嘅音樂椅又再響起，今次輪到多個局長新聞秘書大執位。聽聞政制及內地事務局局長譚志源（Raymond）嘅新聞秘書葉潔梅（Bonnie）將會調去房屋署，接替文惠玲（Connie）出任房屋署嘅資訊及社區關係總監兼負責房屋事宜嘅總新聞主任。而商務及經濟發展局局長蘇錦樑（Greg）嘅新聞秘書杜婉冰（Winnie）就會調去政制局接替Bonnie。原本公務員每隔三、四年就重新調位或改變工作性質係好正常，問題係Winnie出任Greg嘅新聞秘書都未夠一年，唔通Greg真係咁趕客，令Winnie急急腳走夾唔抖？
據悉Bonnie出任政制局新聞秘書已超過四年，係時候同Raymond講「拜拜」，所以佢將調去房屋署接手Connie嘅工作。雖然由「局」調去「署」，望落好似降咗職，不過其實係屬於同級調任。至於政制局局長新聞秘書將由Winnie接手，而Connie就會調去填補Winnie嘅空缺。
次次遇問題就玩隱形
原本派駐北京嘅Winnie，去年十月先至從北京調返香港，接替升任政府新聞處助理處長嘅吳綺媚，出任Greg嘅新聞秘書，點解未夠一年又再調職呢？八卦友話畀我哋聽，外界一直有傳Winnie同Greg不咬弦，Greg一向都同公務員團隊摩擦多多，一來信唔過下屬，二來又唔鍾意下屬搶佢嘅風頭。
咪以為Greg因此就會事事親力親為，查實佢又愛理不理，次次商經局遇到惹火議題時，Greg就玩隱形。好似去年立法會就財政預算案拉布，佢就冇喺立法會開會，要商經局副局長梁敬國代替佢喺立法會「罰坐」，自己就去咗元創方出席活動兼「血拼」買鞋、買耳筒，結果就閙出立法會主席曾鈺成不知梁敬國是誰嘅笑話。今次Winnie極速「逃難」，唔知同呢位麻煩上司有冇關係呢？至於接手嘅Connie可唔可以同Greg合作愉快，就要拭目以待喇。