中環出更：阿基同蕭偉強有三段緣
民協立法會議員馮檢基前晚喺深水埗舉行春茗，勞工及福利局局長蕭偉強（Stephen）、政治助理黎穎瑜同食物及衞生局副局長陳肇始等人都有到場，排場明顯威過民主黨。Stephen自爆同阿基有三段緣，阿基既係佢師兄，又係佢太太嘅師弟，所以兩人分外老友鬼鬼咁話。
係「師兄」又係「師弟」
Stephen細數三段緣，話自己小時候住喺深水埗南昌街嘅板間房，成日都去附近一間餅店買平價麵包，同喺該區起家嘅民協可謂係舊街坊，不過當年佢仲未識得阿基。後來Stephen考入香港大學時，就識咗阿基呢個師兄。之後阿基去英國讀書，同Stephen太太讀埋同一個系，但就做咗師弟。Stephen笑稱，所以佢見到阿基都唔知叫佢「師兄」定「師弟」好喎。
講番當晚咁多官員去捧場，同早前問責班子無一出席民主黨黨宴明顯有別，Stephen賣口乖話，政府同民協喺多個議題上有合作，梗要到場支持吓。阿基就回敬話，民協不嬲同政府各部門「有傾有講」喇！
卓妮