中環出更：有李拍心口 中藥一定有
近期流感肆虐，好多市民都特別注意健康。早前卓妮喺中華總商會春節酒會上見到做藥材生意嘅中總會董李應生（Tommy），講到邊種藥材對治療感冒或增強免疫力較好，佢話金銀花及板藍根等中草藥對清熱有療效，對應付或預防感冒有一定幫助。呢啲都係比較便宜嘅藥材，所以唔需要擔心會被內地客搶晒咁話。
內地客較少掃平價貨
呢一波流感疫情好嚴重，唔知有冇帶動中草藥銷路？Tommy話，近年多咗內地客來港買藥材，因為香港店舖信譽好，能較放心食用，但佢哋都只係集中購買冬蟲草及野生人參等較貴價貨品，反而平價貨就好少人爭住掃，所以唔使驚買唔到中藥。
「蒜頭加鹽煲水飲助消炎」
經營中成藥生意嘅中總會董黃楚恒就話，中藥對感冒病情初起時比較有效，但每個人體質唔同，與其病咗先至依靠藥物治療，不如增強自身抵抗力，每日做多啲運動，作息定時，自然病痛少啲喇！
博愛醫院副主席陳李妮（Lily）都有到場，佢分享照顧家人健康嘅自家秘笈，當有感冒時，可以用蒜頭加鹽煲水飲，據聞有消炎作用，同時要食多啲含豐富維他命Ｃ嘅水果，或用鮮榨檸檬汁溝水飲都得，不過要食少少嘢打底防胃痛。至於喉嚨痛時好多人習慣沖蜜糖飲，佢就提醒大家唔好用熱水沖，因為會令蜜糖味道變酸，當中嘅營養成分仲會被破壞。除此之外，佢日日都會煲自家靚湯畀屋企人飲，好似青紅蘿蔔花膠湯及菜乾陳腎湯，諗起都醒神晒！
卓妮