好嘅唔靈醜嘅靈，車公靈籤話本港羊年運程麻麻，求財半遂，真係中晒。呢，大型基建工程一延再延，唔好話求財，少啲破財都偷笑喇。
醜婦終須見家翁，運輸及房屋局日前向立法會提供文件，交代港鐵沙中線通車日期，話由於多項工程延誤，大圍至紅磡段要到二○一九年至通車，而過海段紅磡至金鐘段仲要拖到二○二一年至通車，兩段都比原定計劃延遲一年。當局係咁講嘅，土瓜灣站古蹟嘅發掘同保育工作令工程滯後十一個月，過海段就因為要配合灣仔填海等工程而滯後六個月，加上要配合會展站上蓋興建新嘅會議中心，最少又要延後五個月喎。
即係咁，沙中線因為保護文物古蹟而導致工程延誤，咁都無話可說，問題係其餘幾條支線齊齊延誤，咁又點解釋呢？就以南港島線（東段）及觀塘線延線嚟講，當局預告明年通車「有一定風險」，唔使問又係打定輸數喇。至於多次爆出嚴重延誤及超支嘅高鐵工程，更加係多災多難，當局最新文件顯示，截至舊年十二月底，高鐵整體工程只完成六成六，比預期進度六成九落後，多項工程進度未如理想，究竟幾時至可以通車，睇怕連港府都矇查查。更離譜嘅係，當局瞞得就瞞，呃得就呃，畀人踢爆仲要死撐，唔係賴天，就係賴地，直至賴無可賴，自己變成無賴。
係人都知，工程延誤，開支自然增加。港府放出風聲，預計現有應急費用不足，隨時要再向立法會伸手增加撥款。話時話，當局預測能力一向麻麻地，一個唔好彩，幾條港鐵支線嘅完工時間隨時一延再延，開支水漲船高咯喎，就算立法會唔阻頭阻勢，當局都好難向納稅人交代喇。
嗱，路政署已經講到明，高鐵若干事項未包括喺最新估算，部分項目要再作評估，即係話超支金額可能遠高於原先估計嘅六十五億元。你話嘞，淨係高鐵超支已經係一盤爛帳，加上其餘工程，豈不是無底深潭？雖然話基建延誤已經唔係新聞，唔延誤至係新聞，但咁樣落去始終唔係辦法o架，呢度超支幾十億，嗰度又浪費幾十億，就算港府識印銀紙都唔掂喇。
北京開緊兩會，國家領導人苦口婆心提醒香港要提升競爭力，至能夠保持長期繁榮穩定。可惜吖，港產官僚胡混度日，得過且過，連基建工程都搞到一鑊泡，又何德何能提高競爭力呢？再講吖，今時今日嘅香港爭拗不絕，內鬥不停，政客關心政治多過關心經濟民生，提升競爭力根本就係天方夜譚。路路不通，事事不順，香港何止運程麻麻，簡直凶多吉少！