政情：賣身畀黃大仙 胡珠半生為奴
健康快車副主席胡珠係酒樓老闆，聘用員工眾多，但呢位飲食業界老行尊，前半生竟然係奴隸！胡珠日前出席一個道教藝術展時話，佢同道教有不解淵源，除咗佢嘅祖先都係信奉道教外，佢嘅前半生仲係黃大仙嘅奴隸，皆因當年母親唔想佢步上兄長夭折嘅後塵，所以佢年幼時就賣身畀有求必應嘅黃大仙為奴，以期神明庇蔭之下能健康成長，所以呢種奴隸生涯並唔艱苦。
自爆原名胡豬
胡珠又自爆，長輩認為天意最愛作弄身驕肉貴嘅人，所以幫佢起咗個比較謙卑嘅名，叫胡「豬」，即取其生命力有如豬一樣頑强之意。不過，叫「豬」唔係咁好聽，因此就以同音字「珠」來替代嘞。咁胡珠係幾時結束奴隸生涯呢？佢話結婚時向黃大仙誠心上香，就算係恢復自由身。胡珠話，雖然同黃大仙唔存在賣身契約，但深信舉頭三尺有神明，因此必奉黃大仙為人生主宰。