邊境水貨活動頻繁引起民生問題，近期出現多次反水客示威行動，唔少更加演變成激烈衝突。有見及此，唔同政黨都就打擊水貨活動提出建議，且提得七七八八。點知公民黨（公文袋）尋日先至走出嚟提議開徵「即日陸路離境稅」，以增加走水貨活動成本，減低走水貨誘因，但此舉就同民主黨（白鴿黨）提出嘅開徵陸路旅客入境稅建議大同小異，真係慢幾拍兼執人口水尾。
點解公文袋咁遲先至回應有關政策呢？眾所周知，該黨新界東議員湯家驊一直同個黨貌合神離，至於新界西議員郭家麒一向都係負責醫療衛生、政改等議題，兩人會否理會呢單嘢真係成疑。不過，其實該黨議員毛孟靜（阿毛）曾經多次就水貨客問題出聲，但主要同新民主同盟議員范國威以「香港本土」名義發聲，要求政府取消一簽多行，並為個人遊設限。阿毛唔聯同自己個黨提出建議，反而依靠其他政團發聲，莫非呢啲真係泛民政黨先做得出嘅？