政情：貪湯下屬全身而退
「貪曾」前特首曾蔭權爵士同愛將「貪湯」前廉政專員湯顯明被揭發連串貪腐醜聞，其中貪湯在任時豪花公帑遊山玩水，買茅台烈酒宴客，同多次送贈名貴禮物畀內地官員，令外界質疑佢利用公職身份同香港納稅人嘅血汗錢去為自己卸任後擔任政協鋪路。廉政公署前年五月已經就貪湯被指濫用公帑一事展開刑事及內部調查，但就一直歎慢板，就連貪湯下屬廉署社區關係處處長穆斐文都即將喺本月下旬退休喇，究竟廉署仲要就貪湯案拖延到何年何月何日呢？
穆斐文3．23退休
廉署對貪湯案一拖再拖，貪湯日前仲自稱廉署對佢作出嘅調查已經完結，等於摑咗廉署一巴。當公眾對廉署調查貪湯一案不明不白之際，原來貪湯嘅得力助手穆斐文已年屆六十，廉署早前發出內部通知，公布穆斐文將於本月二十三日退休，並由行政總部助理處長伍國明署任其職位，伍國明嘅職位就由社關處助理處長何渭枝署任。
知情人士透露，如果廉署調查貪湯一事最終涉及刑事，穆斐文未必可以甩身，但如果只涉及內部違規，而穆斐文本月就同廉署講「拜拜」，變相可以全身而退，毋須為貪湯事件負責，加上廉署人員冇退休金，即使犯錯都無得扣減，穆斐文可以話係零損失。
明知湯外訪去玩
其實穆斐文呢位社關處一姐一直受同袍尊重，但貪湯事件就令佢英名盡喪。佢喺立法會政府帳目委員會調查貪湯嘅公開聆訊中就被踢爆，喺貪湯貪腐無度嘅過程中扮演住重要角色，包括貪湯多次藉外訪之名遊山玩水，佢明知係「玩嘅成分居多」，但都未有指正。貪湯豪使近五萬元公帑送餅畀內地官員，佢事後仲狡辯話食品唔屬於禮物，更被質疑唔守廉署常規，容許分單買酒避超支等。
雖然穆斐文責無旁貸，但佢就幸運地逃過帳委會嘅譴責，之後嘅立法會專責委員會亦未有向佢「開刀」。如果廉署繼續對貪湯案歎慢板，甚至放生貪湯，連帶貪曾案都係一拖再拖當無件事，咁香港嘅廉潔就此玩完。