中環出更：炒風四起輪到威忌
春寒料峭，新春團拜陸續有來。香港南京總會（總會）早前假銅鑼灣富豪酒店舉行新春團拜暨恭賀懲教署前署長單日堅（單Sir）榮休，現身同樂嘅各界好友眾多，十分熱鬧。仁濟醫院總理鮑誠業同做投資嘅好友方志基（Nigel）都有到場，Nigel話近期全球威士忌酒價格因內地人搶飲而飛漲近五倍，佢已買下一間蘇格蘭酒莊，相信呢股炒風將成為今年亮點。
內地人嘅購買力全球聞名，只要十三億人民興起買乜，價格必定被搶高，呢期輪到威士忌酒成為新寵。投資專家Nigel話，最近內地人流行飲威士忌，無論陳年或新酒都瞬間被搶購一空，令酒品極之渴市。Nigel睇好呢個商機，即刻買間酒莊大量釀酒，但至少要三年後先可應市。
張心瑜單日堅紙巾結緣
講番新春團拜，仁愛堂前主席兼總會會長張心瑜（Fiona）一早到場迎賓。已退休兩個幾月嘅單Sir話，佢同Fiona結緣於十幾年前赤柱監獄嘅一場在囚人士畢業禮，當時嘉賓例牌唔准帶隨身物品，被現場氣氛感動流淚嘅Fiona事後向單Sir投訴，點解唔派紙巾畀人抹眼淚，兩人自此結識，後來更成為好友。
Fiona就笑稱，單日堅好叻，係人才又怎可退休？所以已委任佢做總會名譽顧問。同為名譽顧問嘅懲教署前署長彭詢元亦在場，佢話近年本港重犯率大幅下降，同各界支持釋囚更生有莫大關係，值得大家瞓身力撐咁話。
卓妮