物競天擇，適者生存，唔止係叢林法則，亦係商業社會嘅遊戲規則。照咁睇，一個年年虧蝕、頻頻見紅、財政表現廢絕全港嘅機構，競爭力幾乎係零，係咪好應該快啲摺埋，無謂繼續獻世呢？
講緊嘅之唔係香港郵政囉。由財經事務及庫務局領導嘅長遠財政計劃工作小組最近發表報告，五個以營運基金模式運作嘅政府機構之中，四個表現出色，賺到盆滿缽滿，只有香港郵政佗衰家，唔止唔達標，仲搞到連續多年錄得虧損，唔係廢絕全港係乜吖。
報告係咁講嘅，截至去年三月底，公司註冊處、土地註冊處、通訊事務管理局辦公室及機電工程署嘅財政表現超額完成，比當局釐定嘅目標回報率高出三至十倍，唯獨香港郵政一枝獨廢，就算一二/一三年度將目標回報率調低，居然一樣唔達標，仲衰到出現負數添，直到上個年度都仲未止蝕，好似倒錢落海咁，問你怕未。
唔怕唔識貨，最怕貨比貨。一樣係基金營運，一樣係自負盈虧，人哋就風生水起，香港郵政就愈撈愈霉，你話管理層唔係尸位素餐、無能混帳都冇人信喇。有立法會議員就講得啱嘞，香港郵政一直管理拙劣，部門士氣低落，服務差強人意，繼續以營運基金模式運作盞自暴其醜，不如回歸政府管理好過。
咁又係呀，冇咁大個頭，唔好戴咁大頂帽，唔識營運咪低低哋認衰囉，何必同錢過唔去喎。呢，睇吓香港郵政點回應份報告吖，話就話會開源節流，其實咪又係縮得就縮，早前先至被踢爆將五十九間郵局嘅營業時間縮短半小時至一小時，大部分郵局下午四點半就關門大吉，搞到使用服務嘅市民進一步減少，收入進一步下跌，衰多兩錢重。有工會擔心香港郵政最終會向前線員工開刀，裁減人手節省開支，睇嚟香港郵政唔止無能咁簡單，直情係無情兼無良喇。
話時話，物必先腐而後蟲生，香港郵政不思進取，不務正業，醜聞多多真係唔出奇o架，充當政治打手滋擾東方報業集團事件，就係明證嘞。香港郵政無厘頭將一批貼足郵資、地址無誤嘅信件退回東方報業，其中有啲信件仲畀人擅自開封，三歲細路都知事非尋常喇。事件發生幾個月嘞，但當局到依家仲未有交代，甚至連一句道歉都欠奉，鬼鬼祟祟成咁，有冇再離譜啲吖。
即係咁，今時今日科技日新月異，一部手機在手已經可以聯繫世界各地，加上速遞公司愈開愈多，服務愈做愈好，到底香港郵政仲有冇存在價值，唔使問阿貴都知喇，你話係咪？