政情：夏千福「普」談宗教 唔敢論政
被喻為「小八國聯軍」之首嘅美國駐港總領事夏千福，被中方批評過之後，近期低調咗好多，就算出席活動，對本港政改都三緘其口。夏千福尋日出席道教聯合會舉辦嘅道教藝術家廖宗東畫展開幕禮，一樣唔講政治，只談宗教。而佢喺兩分鐘嘅致詞內，更全程用普通話發言，並向在場賓客拜年。
香港道教聯合會為迎接道教日，將展出數十幅廖宗東嘅道教神仙工筆畫，當中繪畫了眾多道教神仙，栩栩如生、活靈活現。夏千福話，好高興獲大會邀請，並好欣賞廖宗東嘅畫作。佢致詞後繼續用普通話同廖宗東交談，可見佢對自己嘅普通話有信心。廖宗東亦欣賞夏千福嘅普通話，並送贈一幅媽祖畫像，廖指夏千福係男人，屬陽，而媽祖是女性，屬陰，正好構成道教嘅一陰一陽。