政情：泛民鬼打鬼 人力「揼實」轉軚議員
近期政圈無論係官場定係議員之間嘅飯局聚會中，都熱議政改方案係咪能夠獲立法會通過，表面上個個都話睇淡行情，但一講到開盤打賭，就認為政改應該可以通過，似乎大家都睇死會有泛民議員轉軚支持。人民力量（人力）因應近日有泛民提出各種可以考慮對政改「袋住先」嘅條件，決定先出口為強，誓言會狙擊轉軚嘅泛民議員，實行票債票償，而且仲會變本加厲，除咗喺區議會選舉發起狙擊外，功能界別議員都唔會放過喎。
警告空群而出
人力尋日宣布準備啟動「票債票償」運動，佢哋話因為近日有部分泛民提出如果北京應承二○二○年會取消立法會功能界別，或願意就人大「八三一」決定作出些微改動都可以考慮對政改袋住先，但佢哋並唔認同，所以要預先「警告」泛民，如果泛民認為少少讓步就收貨嘅話，人力就會積極考慮狙擊轉軚嘅泛民議員。
人力立法會議員陳偉業（大舊）就話，今年嘅區選佢哋原本針對建制派就派出約二十人參選，但如果泛民有人轉軚支持政改，佢哋就會「空群而出」，狙擊轉軚嘅議員同政黨。如果轉軚嘅係功能界別議員，即使人力唔會派人出選功能界別議席，相信亦都會有「義士」喺立法會選舉展開狙擊喎。大舊仲明言，佔領行動期間人力同唔少參與佔領嘅社群都有聯繫，相信人力再發起票債票償運動，唔會再係單打獨鬥，絕對會比一一年區選時更加壯大。
周六旺角「開打」
人力本周六會喺旺角行人專用區發起「麒麟俠怒打港共小人」活動。過往佢哋打小人嘅對象都係政府高官等當權者，今年就加埋六名被指有機會轉軚嘅泛民議員，包括衞生服務界李國麟、教育界葉建源、民協馮檢基、資訊科技界莫乃光、會計界梁繼昌及公民黨湯家驊。人力立法會議員陳志全就話，「打」幾位泛民議員唔係要咒佢哋，而係要「揼實」佢哋張票，等佢哋「實啲」、唔好轉軚喎！