中環出更：白鴿黨慶 長毛「趕客」掃興
民主黨（白鴿黨）上周五舉行二十周年晚宴，由於佢哋揚言要杯葛政府第二輪政改諮詢同要否決政改方案，搞到政府一眾高官都杯葛該黨晚宴。不過，據聞該黨最嬲嘅唔係班高官唔出席，而係泛民主派嘅「友好」公民黨（公文袋）都唔畀面，一個立法會議員都冇到，亦不滿社民連議員梁國雄（長毛）當晚喺晚宴中呼籲大家支持辭職公投喎。
公文袋乏溝通 晚宴冇影
聞說公文袋法律界議員郭榮鏗原來答應出席，但就唔知點解放飛機。而公文袋黨魁梁家傑就寧願去睇管弦樂表演都唔畀面出席晚宴。咁嘅景況難免會令人覺得泛民兩大政黨不咬弦。不過，有人就稱了解後得悉其實係因為公文袋幾位議員溝通不足，大家都以為對方會赴宴，結果最後就擺晒烏龍，冇人出席。
另一樣令白鴿黨不滿嘅就係長毛係晚宴中提及辭職公投。話說有「AV仁」之稱嘅白鴿黨前主席何俊仁宣布計劃辭職發動公投，搞到過往都會出席該黨晚宴、甚至科水畀佢哋嘅建制派中人都喺今年縮沙，所以該黨都冇再高調提及辭職公投，以免「趕客」。點知長毛就喺度玩嘢，所以唔少白鴿黨人都好嬲長毛，好彩該黨最後都籌到逾三百萬元。
卓妮