走鬼檔霸道 食署扮盲
「走鬼檔」霸路擺賣，食環署竟「睇唔到」！觀塘公共運輸交匯處與大埔翠屏花園外一帶行人路皆為無牌小販擺賣黑點，食環署即使接獲投訴亦稱「冇發現」，被指執法態度消極，令無牌小販更有恃無恐。區議員要求食環署關注情況，盡快聯同其他部門或管理公司採取執法行動，還路於民。
「呢度成日都有走鬼檔，過年就更加誇張，條路本身已經唔係闊，加埋啲小販就更加冇路行，有時明明趕得切上巴士，都因為啲檔塞住行唔到，眼白白睇住架巴士開走！」家住觀塘的阿明表示，港鐵觀塘站D1出口往觀塘公共運輸交匯處的行人路為無牌小販黑點，於農曆新年前更為猖獗，行人路兩旁擺滿賀年用品、食物甚至衣物等攤檔，更有專人把風，不滿食環署無視問題。
街坊：簡直無王管
與此同時，大埔街坊李小姐亦指翠屏花園對出行人路常被無牌小販攻陷，「周不時都見啲小販喺度擺檔，新年前就仲犀利，又利是封又擺設，佢哋好醒o架，禮拜日銀行閂門就放晒喺有蓋行人路出面，食環唔嚟巡就再擺出啲，簡直無王管！」
食物環境衞生署發言人證實，過去一年就觀塘公共運輸交匯處及大埔翠屏花園無牌小販問題分別接獲六宗及兩宗投訴，曾作十四宗及六宗檢控。接獲轉介後再派員到兩處地點巡查後，均無發現無牌擺賣。
大埔翠屏花園管理處發言人稱，過去一年接獲七宗口頭投訴，強調每次均即時派保安員驅趕小販，有需要時會報警處理，亦有就問題與食環署溝通，但承認尚未有聯合行動。
口頭警告乏阻嚇性
然而，記者於食環署及管理公司回覆後再到大埔翠屏花園了解，發現無牌小販有增無減，即使正值天降微雨，途人亦因小販佔用有蓋通道，需冒雨走出全無遮無擋的行人路行走。
「簷篷底有部分位置係私人屋苑管理範圍，出咗石壆就由食環管理，啲小販就係睇準呢個漏洞喺度搵食，所以食環署應該同管理公司做聯合行動，先至可以解決到問題！」大埔區議員區鎮樺認為，食環署明知小販問題癥結所在仍未有積極處理，令小販有恃無恐，要求盡快檢討。
觀塘區區議員顏汶羽亦要求食環署加強到區內黑點執法，以還路於民，「只有票控先可以增加無牌小販嘅經營成本，口頭警告根本冇阻嚇性，小販問題始終冇辦法解決！」
記者：麥泳欣
攝影：蘇敏婷、詹海萍