同人唔同命，呢個世界好多嘢都好唔公平，就連宣揚平等嘅平機會都唔例外，主席周一鑊獨享減辛不減薪嘅福利，而中低層待遇就一味縮皮，連偷懶權利都唔能夠一視同仁，你話平機會係咪摺得吖。
唔係吹水o架。本報取得一份機密文件，顯示周一鑊喺未充分諮詢其他平機會委員下，自行建議加設一個月薪十六萬元嘅營運總裁職位，預計最快愚人節生效。點解要開呢個新位？周一鑊話喎，咁做係要分擔主席嘅「沉重」職責，同時避免權力過度集中於主席而出現嘅各種風險，等佢可以專注對外交流喎。講咁多，其實咪又係想推卸責任。咪畀人睇死，所謂「對外交流」，慌唔係好似佢上上手鄧爾邦同前主子貪曾咁，周遊列國歎世界咩。
講真，偷懶都算嘞，最離譜係增設新職後平機會高層每年薪酬增加近二百萬元，但整體開支就維持不變，亦唔會裁員。咁即係點？即係搵中低層員工福利開刀，即係肥上瘦下囉。咁都唔止，聽講新位已經有內定人選，周一鑊係咪想益自己友，咁就要問佢自己嘞。
即係咁，平機會已經係獨立王國，周一鑊扮晒土皇帝，佢想偷雞「僭建」副手職位，可能冇人阻得住，但唔該喺佢自己人工度扣，咪淨係識剝削中下層至得o架。本來係周一鑊一個人嘅工作，依家由兩個人分擔，咁一份糧兩份分，都好公道啫。再講吖，佢老哥家陣每個月逗緊廿三萬薪水，即使減十六萬都仲有七萬幾袋袋平安，以佢撞板多過食飯嘅「工作表現」，已經掩住半邊嘴笑喇。
嗱，講開僭建，周一鑊真係有呢鋪癮o架。佢除咗僭建屋企騎樓鬧到滿城風雨，上任平機會主席冇耐，提出對事實婚姻歧視進行諮詢，又被關注團體鬧爆「僭建法例」，家陣發展到僭建新職位，下次唔知又搞邊科。講到底，港府對周一鑊愛護有加，聽之任之，佢仲唔搞搞震，慌死香港唔夠亂咩。
真係諗極唔明，周一鑊以前做官禍港殃民，早就有口皆悲，係人都知道佢廢柴，避之則吉喇，港府千揀萬揀，偏偏揀着呢舊廢柴，委以平機會主席之職，結果周一鑊唔單止將「每周一鑊」嘅精神帶入平機會，仲發揚光大，簡直唔衰攞嚟衰，淨係涉嫌無理解僱鬧上法庭，已經令人側目。唉，詞人「眾裏尋他千百度」就話浪漫啫，港府「眾裏尋鑊千百度」，咪盞自取其辱。
嗱，連一向厚面皮嘅周一鑊都死死地氣承認，平機會喺佢領導下「出現風險」，如果港府仲唔拿拿聲「拆彈」送瘟神，遲早再爆大鑊嘅咋！