探射燈：教席爭崩頭 轉行者眾
修讀香港大學文學士的Zoe（化名）在二○一一年畢業，工作一年後再進修中學通識學位教師教育文憑，一三年獲取教師資格便開始找教席，「搵工嗰陣已經好少通識教席，都寄咗好多Resume（履歷），搵咗成年都冇消息，連TA（教學助理）都搵唔到，惟有做住補習社同私人補習搵錢。」直至去年九月，Zoe才有小學錄取，雖然是合約老師，但僅屬半職，「人工低一截，要幫人補習幫補。」她又指，不少與她一起修讀教育文憑的同學，至少一半人已「轉行」，「有啲同學學歷好高，都搵唔到教席，走咗去做文員或秘書。」
內地畢業生吃香
Zoe指，近年各學校充斥雙非學童，內地畢業生成「搶手貨」，「不少學校都鍾意請內地生，覺得佢哋普通話好，又可以用普通話教學，原本已唔多嘅教席都畀佢哋拎埋，本地畢業生又少咗機會。」她直斥，本港生育率下降，港府遲遲未全面實行小班教學，教師需求大減，施政報告未有解決教師就業問題，若然有意輸入教育專才，「會搞到我哋冇晒出路！」
根據一三至一四年本港提供教育課程院校的數字，香港教育學院職前教師教育課程畢業生人數為一千二百七十九人，香港大學修畢學位教師教育文憑的人數有三百三十八人，中文大學有約五百人，浸會大學則有二百一十五人。換言之，每年有逾二千三百人投身教育的勞動市場。