工黨同街工立法會議員梁耀忠（阿忠）之間嘅關係，被形容係「這麼近、那麼遠」，因為兩者無論喺政治、社福同經濟政策嘅立場都非常相近，工黨亦因而一直想招攬阿忠入黨，幫工黨壯大聲勢，但一直只聞樓梯響。不過，事件近日有新發展，就係阿忠改為同其他獨立泛民合組「七劍俠」，擺明就係要同工黨分道揚鑣。
自從民主黨何俊仁（AV仁）宣布要辭職發動變相公投後，阿忠同工黨之間嘅良好關係就慢慢起咗變化。事關工黨大力支持AV仁辭職，該黨主席李卓人仲加入由泛民政黨組成嘅工作小組，為AV仁出謀獻策。據聞阿忠經常私下話，唔明點解AV仁要做啲損人不利己嘅事，更唔明點解工黨要瞓身支持，言談之間似乎唔多同意工黨嘅決定。
民協議員馮檢基（阿基）尋日同傳媒拜年時透露，阿忠喺新年前決定加入佢哋喺飯盒會嘅陣營，同其餘六位獨立議員結成聯盟。阿基仲將「六壯士」改成「七劍俠」，以示歡迎阿忠加盟。我哋尋日亦有打過電話畀阿忠問佢同工黨分道揚鑣消息，不過佢就無回覆查詢。