政情：「六散人」正名：六人組
建制派六名獨立議員包括商界廖長江、保險界陳健波、體文界馬逢國等去年開始合組平台，但一直未諗到用咩名，但佢哋又唔想繼續做「六散人」，尋日終於正名為「六人組」。而六人組之一嘅陳健波，就因近期言論次次都瞄準泛民發炮，令佢贏得「衝擊波」嘅新外號。唔知道六人組擁有「衝擊波」呢個秘密武器，日後對泛民會採取咩針對行動呢？
廖長江、陳健波、馬逢國、建築界謝偉銓、金融界吳亮星（星爺）同旅遊界姚思榮六人，去年因泛民拉布戰而結合，佢哋六人合作咗半年，都未諗到改咩名好，所以外界多以「六散人」去稱呼佢哋。據聞有泛民以「中字派」形容佢哋，暗示多人有中資背景。而拖延多時後，「六散人」尋日趁新春團拜時正式正名為「六人組」。
星爺扑錘 輪流做召集人
據稱「六散人」曾諗過多個名稱，包括「六君子」等，不過基於君子通常無好下場，甚至係被犧牲嘅多，因此最終由星爺一錘定音，決定叫做「六人組」，底因係夠簡單。據知「六人組」會輪流做召集人，現時由廖長江先擔任，至於幾時至換人出任，佢哋不約而同話無乜所謂。
不過，如果以為「六人組」代表佢哋太溫和，無乜殺傷力，咁就太睇小佢哋。事關六人組之一嘅陳健波，最近被馬逢國改咗個花名叫「衝擊波」，原因係陳次次喺立法會發言都例不虛發、火力十足，一定衝散泛民口中歪理。
陳健波承認，的確唔少建制派議員都好期待佢發言，不時問佢「點解仲未到你講」。但「衝擊波」話自己講道理，唔係衝擊其他人，應該叫「道理波」好啲。馬逢國強調，「衝擊波」呢個名夠響，易入腦，而且陳健波係用言語去衝擊人，啱晒o架喇。至於「衝擊波」同佢所屬嘅「六人組」第一波攻勢係乜，大家認真拭目以待嘞！