中環出更：議員團拜大顯廚藝
新正頭團拜接踵而來，一眾立法會議員於年初五趁機大顯廚藝，其中以資訊科技界議員莫乃光（Charles）同會計界議員梁繼昌（Kenneth）最應節，於羊年合力炮製全羊宴。負責煎羊架嘅Charles大談當中秘訣，話首先要買一隻羊架，然後逐一劈開，隔一晚再加啲檸檬、海鹽同香草煎香。不過當問到係咪親手製作，Charles笑笑口話「我都有幫手煎o架」。
Kenneth就負責煮烤羊肉，佢話呢味餸做法簡單得多，只需要用錫紙包起羊肉，放入焗爐焗兩個鐘就得。佢仲透露，名廚李錦聯係佢讀皇仁書院時嘅師弟，可惜皇仁冇家政堂，令佢冇機會向對方偷師。
民主黨主席劉慧卿同日率領黨友同傳媒團拜，其中黨兩名副主席尹兆堅、羅健熙亦大顯煮功，合力煮咗大蝦沙律、黃金蝦球、香草薯角同糕點等菜式。尹兆堅話，今次係第二次煮黃金蝦球，可能因為少用無火煮食，所以有少少失手。
至於佢哋嘅黨友坐定定喺側邊等食，卿姐等人大讚餸菜賣相好。而議員胡志偉話，平日主要係煮吓啲家常小菜，太複雜嘅就唔太識煮喎。
王庭聰細女年底出閣
另外，港區人大代表王庭聰一如往年，喺新春期間去咗國學大師饒宗頤家拜年，仲透露今年十二月將會協助舉辦饒宗頤嘅百歲壽宴。值得一提嘅係，繼王庭聰嘅大女上年出閣，佢嘅細女喺今年十二月亦會擺酒，仲記得佢當時送咗層樓畀大女做結婚禮物，唔知今年會送咩畀細女呢？
卓妮