醫院毒氣爆晒燈 睇病衰多幾錢重

有病要睇醫生本來係常識,家陣居然變成兩難問題,事關今時今日公立醫院急症室同門診已經淪為散播流感等惡菌病毒嘅「毒氣室」,睇醫生分分鐘病多幾錢重。睇又死唔睇又死,你話係咪兩難吖。

唔係靠嚇o架。呢,本報記者最近聯同空氣專家巡查公立醫院急症室以及普通科門診,發現幾乎全部肥佬,超過九成室內二氧化碳濃度超標,其中重災區嘅筲箕灣同西營盤普通科門診,二氧化碳濃度超過二千ppm,足足比環保署嘅建議標準高近兩倍。急症室亦唔好得幾多,瑪麗醫院急症室錄得超過一千一百ppm,本報測試嘅八間急症室裏面,只得北區醫院勉強合格,問你怕未。

點解搞成咁?之唔係公立醫院嘅通風系統差到冇朋友囉。有醫院嘅換氣系統壞咗兩個幾月都唔換,有啲就仲用緊冇添加鮮風功能嘅老爺冷氣機,有乜法子唔變毒氣室吖,病人之間焗住「同呼吸,共命運」,真係諗起都牙煙。正如有學者警告,只要有患呼吸道疾病嘅人存在,任何空氣唔流通嘅地方都可能導致病人交叉感染,特別係病人打乞嗤嗰陣,病毒會連同唾沫停留喺空氣中,如果空氣唔流通稀釋唔到,就可能傳染畀其他人。當年沙士之所以咁大鑊,都係因為室內殺菌得唔好,搞到病毒積聚同近距離傳播嘅咋。

講真,流感爆到七彩,死亡人數節節上升,雖然話係因為病毒漂移,原有疫苗失效,但醫院同急症室空氣唔流通有冇加重疫情,真係好難講。有專家話今次冬季流感死亡人數隨時超過當年沙士,絕對唔係杞人憂天。當局應對流感失策,搞到全世界搵疫苗唔在講,連室內通氣咁簡單嘅嘢都做唔好,簡直靠害。

醫院變毒氣室已經得人驚,更加得人驚嘅係,香港自詡國際大都會,原來至今仲未規管室內空氣質素,官老爺梗係闊佬懶理喇。反觀南韓、台灣同內地,早就有相關法例,其中南韓同台灣更明文規定醫院嘅二氧化碳濃度唔可以超過一千ppm添。港產官僚開口埋口「藍天白雲」,原來只係大隻講,唔怪得好似阿崩叫狗咁,愈叫愈走啦。淨係睇吓每年一度嘅馬拉松,唔單止普通參賽者頂唔順污濁空氣跪低,連非洲專業選手都跑到嘔,就知咩事。話時話,成個香港烏煙瘴氣,連醫院都唔例外,前特首曾蔭權爵士涉貪固然要追究,「氣候逃犯」嗰筆都要算清楚o架。

所以話啫,香港最惡嘅病毒唔係流感病毒,亦唔係導致沙士嘅冠狀病毒,而係一種叫做官僚主義嘅病毒,此病毒不除,香港想有運行都難。