李敖說：妓女不能靠有性慾才能接客；作家不能靠有靈感才能寫作，提筆就寫，要靠習慣，只靠靈感絕成不了好作家。然則，靠靈感估每年財政盈餘嘅財政司司長──又是否會成為一個出色嘅理財高手？
對於「守財奴」鬍鬚曾，佢最煞食一招就係「狼來了」，年年估錯數，今年自然亦不例外，外界一般預料今年盈餘六百至七百億元，與鬍鬚曾早前估計嘅九十一億元相差約七倍！當然，比起佢喺一○至一一年度錯估近一千億元，今年總算「有進步」！
之不過，鬍鬚曾習詠春又擅劍擊，或者未到一代宗師之境界，可精通即使跌落地都要揦番拃沙；日前佢喺大氣電波就話喇，相信今年和未來幾年都會有盈餘，但預料庫房在十年後出現赤字，故目前要調節支出……
真係佢唔開聲，繼續估錯數、守着「政府庫房啲錢即係市民嘅錢」、做其富貴「中產」歎咖啡睇法國電影都算啦，要調節支出，唔該第一個減自己份年薪逾四百萬元嘅收入，就算同美國總統奧巴馬睇齊（奧巴馬年薪約三百一十萬港元），咁鬍鬚曾起碼減九十萬啦，「中產」財爺，你做唔做得到啊！
今日唔知明日事，十年後出現赤字？又嚇人！又呃人！又使出「萬佛朝宗」、「狼來了」──理財一招走遍天下無敵手！香港幾亂都好，其實，守財奴鬍鬚曾不必過早疑患上焦慮症，庫房既然水浸，外匯儲備更令人欣羨，先搞好目前民生多困、佔領運動後嘅民怨喇，守財奴唔承認一次性紓困措施係「派糖」，咁咪開倉派米咯，還富於民，每人一萬現金先啦！
玄學家話香港只要捱過羊年，猴年就可漸入佳境享受「黃金十年」，老朽今趟信玄學家不信「狼來了」，十年後，守財奴不知人在何方，畢竟太老了，若落得在米倉中餓死，是悲催還是報應？