民主黨（白鴿黨）將於本周五舉辦廿周年黨慶籌款晚宴，有傳現屆政府會集體杯葛白鴿黨黨慶，籌款委員會主席李華明（Fred）證實，出席官員數目比去年嘅六十人少成一大截，暫時得十二位官員答允出席晚宴前酒會，包括食物及衞生局局長高永文、運輸及房屋局局長張炳良、行政會議召集人林煥光等，另外美國駐港總領事夏千福則會首次到場。
Fred透露，當晚的籌款目標係三百萬，據知當晚又會拍賣著名畫家Ms Pat Stewart同國畫大師何永祥嘅作品籌款。工作小組召集人游月華話，兩位畫家都會現身出席晚宴，唔擔心今次會「賣假畫」。
另外，該黨立法會議員何俊仁（AV仁）尋日宣布具體辭職時間，話會喺立法會表決政改方案發言時宣布辭職，投埋反對票後先向立法會秘書處遞信。據聞AV仁連年底區選唔會爭取連任屯門區議員，該議席將會讓畀黨內新人溫朗鈞。