政情：財爺反常態 財案爆定先
新年度財政預算案於周三揭盅，財政司司長曾俊華（鬍鬚曾）繼去年底一改口風話政府未來三年都會「年年有餘」，尋日突然以個人名義開設臉書帳戶（Facebook），並以即將發表嘅預算案封面作為個人戶口的首頁圖片，提早披露預算案封面顏色係紫色。鬍鬚曾並於最新網誌爆料指，預算案各樣文稿都準備付印，情況猶如已放進焗爐嘅蛋撻，廚師想再調味都會有一定困難，暗示「派糖」內容已定。鬍鬚曾決定乜都提早爆晒，如果喺預算案公布後先爆鑊就係第二個世界！
試讀演詞記下飲水位
按照過往不成文慣例，鬍鬚曾於預算案公布後先四出解畫，今年疑一反常態，繼前日率先接受電台訪問自嘲一番，自言外界預測同自己估預算案一樣，都有少少差錯，佢尋日於最新網誌自爆，預算案演詞文稿大致完成，最近與同事進行試讀，其中一個重要工作，就係要喺一個多小時演詞中，記下適當嘅「飲水位」。
鬍鬚曾其後提到自○七年以來，一直透過網誌同社會大眾接觸，同大家解釋政策理念，分享人生點滴，而今年預算案前夕，佢決定再增加多一個同社會大眾互動嘅渠道，就係開設臉書。
被形容為「鍵盤戰士」嘅鬍鬚曾自爆，自己一直冇臉書帳戶，亦很少瀏覽其他人臉書，又笑言佢身邊年輕同事應該覺得佢好「大鄉里」，而喺呢個過程中，佢瀏覽咗唔少海外政府官員同政治領袖帳戶，自嘲相比每周撰寫網誌，佢哋比自己更勤力喺網上「發功」，向粉絲同社會大眾解釋政策，形容「他們才是真正的鍵盤戰士」，最後佢再次力撐並希望創新及科技局盡快成立。
fb照似無懼再被掟蛋
值得一提嘅係，除咗率先披露預算案封面顏色係紫色，鬍鬚曾嘅臉書帳戶喺「大頭」照片，係用佢早前出席棒球邀請賽決賽同現役沙燕隊球員切磋球技照片。還記得鬍鬚曾試過出席地區諮詢會時被雞蛋掟中，鬍鬚曾今次「大頭」照片疑意有所指，似乎一副對再被狙擊冇有怕嘅模樣。
不過講到底，鬍鬚曾爆料頻頻唔係問題，最重要唔好喺預算案公布後，先因「派糖」措施力度不足而爆鑊，皆因到時嘅火頭非一時三刻可以撲熄，鬍鬚曾要「補鑊」就唔係咁容易嘅事嘞。