中環出更：九西傳增席 民記勢搶灘
因應立法會五大選區人口變化，有傳政府會微調明年立法會選舉港島區及九龍西議席數目，前者由七席減至六席，後者由五席增至六席，其中外號「元秋」嘅民建聯議員蔣麗芸率先表態，如九西議席增加嘅消息屬實，會積極考慮派黨內新人競逐，並爆料指深水埗區議員鄭泳舜同油尖旺區議員葉傲冬都有機會代表該黨出選，不過最終邊個可以脫穎而出，仲要時間觀察。
白鴿區選怕與「泛團」撞區
蔣麗芸尋日同老公梁海明等人於九西漾日居同傳媒新春團拜，據知蔣麗芸於前年以二千多萬購入呢個逾千呎嘅單位，佢又一度歌癮大發，即場獻唱已故歌手梅艷芳主唱歌曲《心債》，唔知當時坐喺窗台嘅梁海明，當時有乜感受呢？
同日分屬泛民嘅民主黨（白鴿黨）黃碧雲（一舊雲）亦同該黨多名新人同傳媒團拜，一舊雲表明無意搶灘九西新增議席，反而擔心其他泛民團體同該黨新人於年底區議會選舉「撞區」，會令建制派漁人得利。佢透露，該黨會試下呼籲佢哋轉區，不過如果對方堅持唔肯走，佢哋惟有硬住頭皮迎難而上。
卓妮