中環出更：方文雄預測羊年經濟反覆
踏入羊年，港人都渴望一圓置業夢，經濟股市繼續興旺，不過多名政商界中人對於羊年經濟審慎，未有只顧一味唱好，其中協成行董事總經理方文雄（David）預測，羊年香港經濟好反覆，又認為細價樓三個月爆煲論嘅可能性唔大，事關熱錢仍會持續流入香港。佢相信，本港基調良好，借貸有金管局睇到實一實，無咁易會爆煲。
David又坦言，市民投資樓市有難度，反而睇好內地科技股，理由係中國搞創意嘅公司漸見成熟，有信心繼阿里巴巴等公司，將來有更多科技公司爆紅，所以佢自己早前都有尋寶，發掘股價有潛質升值嘅科技公司。
鄭錦鐘談外匯唔敢撈低
保良局前主席鄭錦鐘透露今年投資心得，自言會集中火力投資港股，預計農曆新年後將展開新升浪，尤其睇好內險股，不過近日跌勢持續嘅日圓、澳元或歐羅，佢就唔敢撈低，擔心有關跌勢係啱啱開始，低處未算低。
講番理文造紙當日贊助年初二煙花匯演，李家總動員出動，其中百仁基金主席李文俊就搵咗約一百名學生到場幫手，體驗如何舉辦大型活動，而理文造紙主席李運強賞「花」嘅同時不忘妙論經濟，佢認為今年本港經濟唔容易，又笑言今年唔知投資乜嘢好，事關內地經濟放緩，本港股市、樓市肯定麻麻，就連最穩陣嘅人民幣都有貶值危機，所以佢思前想後，決定今年專心做廠嘅工作，雖然利潤唔及炒股快，好過貿然入市做錯決定喎。
卓妮