唔知大家有冇聽過「木匠打枷——自作自受」呢句歇後語？話說清代有個叫戴名世嘅才子，有次見到街上一位木匠犯人，所戴嘅木枷正正係自家出品，於是脫口而出「木匠打枷枷木匠」上聯，但抓爆頭都諗唔到下聯應該點對，後來佢因為文字獄問斬，監斬官同佢一樣翰林出身，於是靈機一觸，對出下聯「翰林監斬斬翰林」。
呢嗱，清代有「翰林斬翰林」，香港有「專員告專員」，真係唔到你唔服。個人私隱專員蔣任宏日前歎完長假返工，新來乍到嘅大樓保安「有眼不識專員」，當佢係訪客，要求填寫包括身份證冧巴等個人資料，點知好衰唔衰，保安冇遮冇掩，上手資料任睇唔嬲，於是咯喎，「市民蔣任宏」咪寫信向「專員蔣任宏」投訴，要求跟進囉。
蔣任宏身為私隱專員，竟然為咗保護自己嘅私隱而要向私隱專員投訴，都咪話唔諷刺。照咁睇，港府早前登廣告公開招聘私隱專員，變相宣告佢約滿後冇得留低，都唔係冇原因。最搞笑嘅係，蔣專員一味死o架，話考慮緊係咪遞申請應聘喎，家陣自導自演呢場投訴騷，動機係乜，大家心照喇。不過點講都好，如果蔣專員有打好自己份工，就唔會自己都淪為受害者喇，呢啲咪正牌「木匠打枷——自作自受」囉。
講番身份證冧巴係咪屬於私隱嘅問題，其實不嬲都有爭議嘞。大家應該記得，年前有人以抗議政府修例限制公眾查閱公司董事身份為由，將千幾名市民嘅身份證號碼放上網，唔少超級富豪都中招，搞到人心惶惶，當時私隱公署拍晒心口話會跟進，點知法律界人士公開唱反調，話咁做唔違法。你話嘞，連身份證冧巴係咪個人私隱都搞到唔清唔楚，旨意佢哋保障市民私隱喎，盞嘥氣啦。
話時話，蔣任宏做私隱專員多年，私隱保障問題冇改善不特止，仲不斷惡化添。唔講「猜猜我是誰」嘅電話騙案層出不窮，涉及大量市民私隱被洩露嘅問題，淨係真人推銷電話令人煩不勝煩，已經擺明失職。仲有，內地多個網站公開兜售港人私隱資料，私隱公署居然要到本報踢爆至如夢初醒，拿拿臨補鑊。難為蔣專員早排上立法會匯報工作，唔少議員仲對佢讚不絕口，你話係咪得啖笑吖。
當然喇，好似私隱公署呢類政治花瓶，從來都係成事不足，敗事有餘，特別係平機會，港府千揀萬揀，竟然揀着個出名廢爆嘅周一鑊嚟出掌，結果佢上任後四圍點火頭，添煩添亂。計功夫茶話齋，新年流流，又係除舊迎新嘅時候，就從掃走唔等使嘅公營機構開始喇！