一項調查顯示港人愈來愈不開心。港人不開心，其實不須調查亦可預料，回歸十八年，香港社會，一字記之曰：亂！一時佔領運動、一時鳩嗚行動、一時反水客行動……政府施政癱瘓，社會停擺、民生空轉。衣食住行樣樣難，尤其「住」，諗起都標冷汗，四百萬嘅「窮人恩物」單位，據云已幾近絕迹，年輕人要置業安居，直如「胡椒浸在醋裏──辛酸得很」！
事實上，毋須調查，多數人都活得不快樂！香港近年劏房急增，政府去年嘅數字話有八點六萬間劏房。你信嗎？反正我信了！住在劏房的這些人，相信不會有孔子門生顏淵的胸懷：「飯疏食，飲水，曲肱而枕之，樂亦在其中矣！」如果佢哋能夠學顏淵，咁香港就唔會有民怨，唔會有憤青，香港唔會係「示威之城」、「動亂之都」而係「聖人之地」矣！
當然，住在劏房，比起聯合國還在為發展中國家超過二十五億人用不上乾淨整潔的廁所苦惱時，住劏房也就不算「痛苦」！
先前，本報記者巡查港九多處地方，發現到處有流浪者「霸佔」行人天橋、隧道，深水埗、旺角成為重災區，搞到嗰一帶烏煙瘴氣，公共衞生堪虞！講真，高官個個住豪宅，一步出臨海露台，吸一口仙氣，口中唸唸有詞：問我何所有，山中唯白雲！怎會知道民間疾苦！偶爾阿媽間公屋單位有鼠患，先知乜原來啲屋邨環境真係咁差。
老朽在此販文認可區寫過一篇「香港衰過抗戰時期」，曾指出：如今嘅特區政府，窮到只剩下錢，卻樣樣搞到頹殘敗壞，樣樣失控，大至房屋政策，小至幼稚園表格一張，都搞到人心惶惶，天怒人怨……說甚麼「民生無小事」，這不是貪官談廉政、騙子論誠信、妓女揚貞操嗎？唉！民怨去到臨界點，香港人怎會快樂起來？